الصفحات

ديوان الشاعر : حسين بن حامد الشنبري الشريف

 بسم الله الرحمن الرحيم

الاخواه والاخوات الاعزاء اهلا وسهلا بكم في ديوان الشاعر الكبير

الشريف : حسين بن حامد الشنبري



فهواستاذ وشاعر واديب وذي اطروحات رائعه وله العديد من الصفحات على النت

والشيلات وبعض الصفحات التي تخدم الشنابره من الاشراف

"1"

القصايد الصوريه

















"2" 

هنا نطرح لكم القصايد الكتابيه 


كفو يابو فهد وتحية(ن)

كفو يبو فهد وتحيا يا سلمان

تحية(ن) من راس الشريف الهاشمي

ياراعي الوقفات مع كل إنسان

ياشوكة(ن) في حلق العدو الغاشمي

وتحية(ن) لأبوحسين حبيب العربان

عبدالله الثاني الغالي السامي

مايعقب الحوثي وتعقب إيران

ياأسود السنة دق الخشب حامي

وولي العهد محمد بن سلمان

غالي غلينا وعالي المقامي

أفرحي ي الرياض وأعتزي يا عمان

بالشهم الكريم أبو فهد الهمامي

ياخادم البيتين عساك فأمن وأمان

كلنا نفداك هذا قصدي ومرامي

وختامها صلو على سليل عدنان

الرسول الهاشمي عليه السلامي

• للشريف حسين بن حامد الشنبري



جَنّ الليل وزاد حنيني
والدموع سكاب
أحزانُ تشاكس عيني
تطرُق الأبواب
الفجر مل من أنيني
وآمالي سراب
فمن غيرك يواسيني
رفقة الأصحاب
ما زال الليل يناديني
أيكم كذاب...؟
أتدري يا قرة العيني
أنك بمثابة الأهداب
فالزهر والعناب والتيني
تعشق الخضاب
ألفٌ وحاءُ وباءُ تسقيني
من كأس العذاب
وشموع الليل تبكيني
على موعدٍ قد ذاب
هيا لنمضي يا سنيني
لن ننتظر من غاب
فهذا الشوق يجافيني
غيمةُ وسحاب
دع الأيام تُنسيني ...
ألا يكفي العتاب
دع الذكرى التي تضنيني ..
فمرها عِذابُ ...


للشريف حسين بن حامد الشنبري

أيا من ظننت بي الظنون

وذهبت إلى أقاصي الفكرُ

أنت تعلم والناس يعلمون

أني لا أجيد التمثيل والمكرُ

القلب والعقل مني يتسائلون

لماذا فقدتٌ أغلى من القمرُ

إن كذبتُ لم يكن بي جنون

بل حريصاً ألا تعلم الخبرُ

لا أريد الحزنَ في تلك العيون

لا أريد أن تبكي علي وتسهرُ

خشية أن بحتُ بسر قد يكون

تكون مرثيتي منكِ على القبرُ

حسبي أن ربي غفورُ حنون

وقد لا يغفر كثير من البشرُ ..

ما زال قلبي وعقلي يتوقون

ومازلت أفكر بمن يهمه الأمرُ

يا ويل قلبي من الهوى المكنون

نعم أعتذر .. لولاكم لما أعتذرُ

للشريف حسين بن حامد الشنبري



 

 

وفي النهايه نتمنى ان نكون قد وفقنا فيما قدمنا لكم عن الشاعر الكبير : الشريف حسين بن حامد الشنبري

وان يكون هذا العمل قد حاز على رضاكم واستحسانكم

ملاحظه :

للوصول الى ديوان الشاعر على الفيس بوك الذي يديره بنفسه اضغط هنا

للوصول الى صفحه الشاعر على الفيس بوك الرسميه اضغط هنا

ديوان الشاعر : عبدالله عجير الدلبحي العتيبي

 بسم الله الرحمن الرحيم

اهلا وسهلا بكم في

ديوان الشيخ الشاعر : عبدالله عجير الدلبحي العتيبي

الاسم كامل : عبدالله عجير سراج الدلبحي الروقي العتيبي

املين ان ينال رضاكم واستحسانكم واعذرونا على القصور ان حصل قصور


" الواشي " او " عقرب الطين "


الله ينزعك يالواشي

يحط قبه من الحبه

يحرف الاصل غشاشي

يزرع لك الشر ويكبه

يـلدغ خفا ثم ينحاشي

من داخل الطين عقربه

المجتمع منه منداشي

سيفه على الغدر يضربه

فالوجه يضحك وبشاشي

ويجمع حطب نار ويشبه

يسرع مثل غمض الارماشي

ياعنك ما خاف من ربه

يفرقش الجمع فرقاشي

ساعة يجي فيه ويطبه

بينه يلولش تلولاشي

والعلم الاقشر يسربه

تراه منه الخطر غاشي

الجمر بيديه يلعبه

يرمي شراره على الماشي

ياعل جمره يعذبه

من يقبل النصح ببلاشي

من فاعل الخير ومحبه

احسن يطنش تطناشي

هذا علاجه وذا طبه

امتدح فيها الشيخ : برجس بن عصاي

" البيجر "

البيجر اللي دبل كبدي بدقاته

نويت حذفه وتركه فالخلا الخالي

ارميه وارمي على الهاتف وريقاته

خلاص ما عاد ابيه اشغلني اشغالي

ويش الغرض فيه هزازه ونغماته

على الكباين تعبت اقفاي واقبالي

مالي مكاسب سواء دفع اشتراكاته

لازم يكنسل واقدم لي بجوالي

تو استوا بعد ما بثو اداراته

كل المناطق يغطيها بالارسالي

يرتاح من يضرب ارقام اتصالاته

لو كان سعر اتصاله يزعل ازعالي

راعيه يزعل ليا فاتورته جاته

سعر الدقيقه بنصف وعشر وريالي

ماهوب للي يكلم فيه عشقاته

خدمه عظيمه وحض لرجل الاعمالي

يتابع اسعار بيعاته وشرياته

يشوف ويش الرخيص وشو الغالي

لازم وجوده ليا جاء وقت عازاته

للمجتمع مايخص اصحاب الاموالي

كلٍ يكلم ويقضيبه شغيلاته

الناس معروف كلٍ عنده اشغالي

وابي اتصل لا طرا للبال سجاته

ادق فوق الرفيق اللي على بالي

برجس يونسك بأشعاره وكلماته

يونس اللي يجيه بكل الاحوالي

اجيه واشوف وشهي مستجداته

واسمع كلامٍ حكيم ويشرح البالي

الطيب اللي مع الطيب علاعقاته

اله علاقات فوق المستوى العالي

رؤس العناتيت دائم في ضيافاته

مفتوح بابه لهم والبيت مدهالي

" في سعد بن ناصر السديري "

سلام في حفلٍ جمع كل غالي

فيه الامير وفيه نخبه رجاله

رؤس الرجال اللي تفك التوالي

بالفعل يوم العلم يكثر جداله

يامرحبا عدة طلوع الهلالي

واعداد رش المزن يوم انهماله

واعداد ما وادٍ من الوسم سالي

في نجد ولا فالحجاز او شماله

ترحيبـن احلا من حليب المتالي

در البكار معربات السلاله

الحفل تكريمن لرجلن مثالي

يرمز لفعل اعماله اللي جلاله

سعد ولد ناصر عريب السلالي

معربن مابين جده وخاله

لو امدحه عبيتلي بوك خالي

ولوهو تعبا البوك ما احصي خصاله

يستاهل المنصب هديب الشمالي

المنصب اللي يستحقه وناله

يالله يالوالي على كل والي

يسرله العسره يواصل نضاله

موجهه للشاعر : دسمان مناحي السبيعي

ياراكب اللي مال ممشاه حنه

مبرمجه بالكمبيوتر مسويه

بواخره من مصنعه وصلنه

ولا تمرن كود بيدين راعيه

من ورارد اليابان يعرف مغنه

لكسزز مصمم نازح البعد يطويه

لونه ذهب ومن اخر طرازهنه

ليا عطا خط الملفات يرسيه

في شاشته دليلته زود فنه

ماهوب في حاجه دليله يوديه

الخارطه والبوصله وجهنه

يوصل القلب المغربل هقاويه

ابيه يومن الظروف طلبنه

ينصا لدسمان السبيعي ويلفيه

في مجلسه تلقاه للعود بنه

فيه الرجال ضيوف ولا عوانيه

يطوفهم بدلال هيل ارسلنه

دائم عليها حامي النار صاليه

وليا جلست وساق فنجالهنه

راسك بعد طول المسافه تصحيه

ثم اطلب الفزعه من القرم لنه

يشفيك ويعيد الامل يم اهاليه

قله ترى عني عشيري خذنه

حدب الظهور اقفن بخلي وانا ارجيه

معهن خذن قلبي وهن قلعنه

والقلب لا ابيعه ولاني بمهديه

لكن يادسمان هن شلعنه

وشالن قلبي ما بقا الا كراسيه

واصبح اسير وعندهن يملكنه

والذل يادسمان مانته براضيه

خلي شلعني من ضحوكه بسنه

وصدره يشابه للقمر يوم احليه

وحلياه خاليت الفياض ارتعنه

ريم الفياض الطاهره من يحاليه

الريم فالبر الفسيح اسكننه

مثلثه وادنى العسيبي مرابيه

من بعدهم ونيت تسعين ونه

يوم الجفا منهم تبين مواريه

حبل الرجاء من بينا قطعنه

امه ومن حوله وناسٍ تواليه

كادن وقالن كيدهن ياصلنه

غصبن على عطر الشوارب تمشيه

من عصر نوح ورايهن يفرضنه

والحبل يبغا اللي يشده ويرخيه

كم جمع شملٍ كيدهن فرقنه

واقفا عن الغالين وديار غاليه

اقفت اركابه بعد ماصلفقنه

صدر معيف وحايماتن ضواميه

هن العهد عاداتهن ينقضنه

البوق من عاداتهن ما تخليه

ابعث مراسيلك لنا يطلعنه

ولا تفضل صامل الراي عطنيه

وخلي ترى كل العيون حرصنه

من شايبن له ماقفن مايخليه

يدينه اسهوم الخطر يرسلن

من يقترب لحماه بالنار يشويه

الشعر جاك من الهجوس اسطرنه

اعرفك ماتبلش بنظمه قوافيه

تسبح بحوره وتعرف قيس هنه

ماطاب تختاره وماشان ترميهة

الى مشعل بن عايد المغيري العتيبي

ازكا تحيه لبوعايد نقدمها

يوم الخواطر بهيض المدح تجتالي

شرد المعاني تسابقله ونلزمها

بيتن يسجل وبيتن يلحقه تالي

تارد وانا اكتب وارتبها وانظمها

يوم اكتب البيت والثاني على بالي

استرسلت وارسلت للفكر حايمها

في مدح من يمدحه لي كل من جالي

رجلً فعول المراجل ما توهمها

طبع وطبيعه ولابه شك وجدالي

الطيبه يوم والمته موالمها

وكسب الثنا فازبه في كل الاحوالي

من ضمن الابطال اسم مشعل بمقدمها

يوصف على الحر فوق الشامخ العالي

يكرم عن الهزل والجزله تغانمها

ينالها لو يسوق ابها الثمن غالي

مجبولتن فيه ماتوه تعلمها

عوايده فالقسا والمر والحالي

كم هقوتن يوم تسندله تزعمها

وصار احتماله لها مضرب للامثالي

وازكا تحيه لبو عايد نقدمها

يوم الخواطر بهيض المدح تجتالي

" انهيار الاسهم "

يالتوم عطني علوم السوق

وش جبت من تالي اخباره

همه يبايشلعونه فوق

ولا يواصل بمحداره

عجل بعلمك لاجاك العوق

السوق ما نعرف اسراره

كم شفت واحد بصدره ضوق

ويصفك يمينه على يساره

من المكيرش يامال فروق

اهب ياسرع مغواره

نبغاه يطلع وجاه اخفوق

مايلحقه كود سياره

بعد بغا يطلع الشاهوق

نزلبنا لسفل القاره

ماذقت منه الفوائد ذوق

ولا ظني اسلم من اخطاره

والسوق وسطه وساع حلوق

كلٍ يصرح عن افكاره

احدٍ قبل قد عطاه صفوق

واحدٍ بداء تو بغباره

يفك صقره بدون اسبوق

ويقول مافيه صقاره

قدام عينه يلوح ابروق

مار الهوامير غداره

كم واحدٍ علقو تعلوق

تعليق قناص لصهاره

ومن لايعلق يجيه فلوق

بالفاس فالراس كفاره

يرجع لبيته وهو مفلوق

يفك ربحـه بخساره

ويقول والله ما عندي طوق

الخير في ما الله اختاره

في برنامج كان يقام بحضر ولى العهد

آن ذاك الملك عبدالله بن عبدالعزيز رحمه الله

بديت باسم الله المعبود سبحانه

وحده رجيناه مغفرته ورضوانه

عساه يكتب لنا عفوه وغفرانه

وسياتنا من كرم فضله يبدلها

من يلتجي للرب ماهوب خايب

الخالق الرازق مزيل الكرايب

ماله شريك وعظم خلقه عجايب

لوكان مثقال ذره مايهملها

نرجوك ياربي تقبل عملنا

وتجاوزك ياربنا عن جهلنا

تقبل الصالح وتغفر زللنا

اعمالنا الها ملايكتن تسجلها

اليوم في قصر ابو متعب تعايدنا

العيد الاول مثل ماهو معودنا

يدوم عزه وشوف الليث يسعدنا

كل المراجل موردنا مناهلها

بمناسبه عيد رمضان المبارك

بمعايد الضرغام جينا نشارك

جينا ولد صقر الجزيره نبارك

عبدالله اللي يعدل ميل عايلها

ولد زعيم العرب واف الخصايل

القائد اللي لم شمل القبايل

بحد الرهيف ومسرجات الاصائل

وقوه عزيمه وصدق ايمان كملها

قبل الموحد كانو اسباع غابه

من بينهم مال الضعيف مهابه

مافيه وازع دين ولا رقابه

وارسل لها الله موحدها وعدلها

ثبت قواعدها وعزز بنا ها

واسس بنود الحكم وابعد عناها

واختار دستورً ينور سماها

الشرع والسنه عن اللي غير فضلها

يقول هذا الارض مهبط رساله

والعرف ماهو في بلدنا مجاله

والشرع لايمكن ندور بداله

وارزاقنا اللي خلقها هو تكفلها

ومن بعده عيال السعد سيروها

تكانفوها بينهم ونهضوها

وبين النجوم العاليه ثبتوها

في قرن كامل مضا هاذي منازلها

وسارت على نهج الشريعه تطور

دائم خطاها ثابته ماتهور

ولاهيب لقمه للصديق المزور

تنقض حبال العدو لوكان يفتلها

تمركزت تحت اسم شبه الجزيره

دوله سعوديه مساحه كبيره

صدقانها واجد والاعداء كثيره

ولا نالها المحتال لو يختلها

فيها الجبال الشامخه والصحاري

ونفودها الكبرى باهلها تماري

وكلً بهضبه نجد عارف وداري

بين العرب مافيه واحد جهلها

وفيها الجنوب اللي يضم المصايف

جبالها تشبه لخضر القطايف

فيه السياحه ماتكلف كلايف

فالقيض بارد ورش المزن يسبلها

بينت رؤس اقلام من بدع قافي

وانا ادري ان الشرح ماهوب وافي

بس الكمال لمن يعلم الخوافي

منشي ثقال السحايب من مخايلها

وصلوا على المبعوث للانس والجان

صفوة قريش الهاشمي نسل عدنان

اللي تعلمنا منه خير الاديان

اسلام قوه والسماحه شملها

في الداعيه : سعد بن عتيق العتيق

ياشيخ ما نبغا حسام يتغير

الله يجيرك من صواديف الايام

يصرف لنا بالعلم شيكن مجير

في كل عام يطلع الفصل قدام

والمستحيله من كلامه تضير

درسه يكفينا منه رؤس الاقلام

بالمعرفه له باع ماهو قصير

معلومته تاصل بلا شك ووهام

بالشرح وافي ماعليه نتخير

يقسم الحصه لثلاثه اقسام

خلا طريق العلم واضح ونير

ماحدٍ صقط من قله الفهم منظام

ان راح كلٍ في دروسه تحير

قمنا نطالعها وننظر للارقام

غير الجمل مانقتنع بالبعير

قو التحمل للجمل تاج ووسام

ياشيخ لاتصغي لناسٍ مطير

لجه وصجه واشغلونا من العام

انت الذي بالعلم ترسم مسير

ارفض طلبهم بالشجاعه والاقدام


" غاده "

غاده تقول لشاعر العشق غلطان

ماهيب له عشقه وهي محجوره

من واحدٍ حرصٍ عليها وشفقان

ومجندله جيش يرسل سبوره

دوريته تسرح وتضوي مسيان

وتكتبله التقرير عن كل دوره

ويسلمونه للنداوي كحيلان

طويل باع ومن وراها شبوره

حرٍ سلايل حر من رؤس عتبان

هي بنت عمه عشقته تحت شوره

ياللي شكيت الحب بالقرب سكان

ليتك على حد اليمن في شروره

ترتاح وتريح ولا تزعج انسان

اغلا من المحار داخل بحوره

لاتزعجه ثم يستضيفك خبر كان

وبدر السعاده ينطفي عنك نوره

حتى ايش لونك تغني وطربان

ما تنخدع غاده بكذبك وجوره

وسعر الذهب بغرام ماهو بميزان

ولاهيب ياطير السعد لعب كوره

عندما رحل جاره

مطارد حصن الشمري

اليوم ادير الفكر والهم زايد

صدري تضايق من هواجس تدالاه

عيت هجوسي تستريح وتهايد

يجتال في صدري من الهم ضيقاه

الصبر والهاجوس قامت تبايد

بعد مطارد ليتنا ماعرفناه

راعي دلالٍ نارهنه وقايد

البـن له خمره وللهيل مصفـاه

مايشتـغلها لابسات القلايد

يحوفها هو يشتغلها بيمناه

من فوق جمر السمر ماهو عرايد

دلال حايل حامي الجمر تصلاه

من حر ماله ما جمعها رفايد

من يوم تقبل له يرحب وتلـقـاه

واله عيالٍ يكسبون الفوايد

مافيهم اللي صد عنه وخلاه

ياعنك مايحتاج عنهم نشايد

ديار حاتم هي مقره ومنشاه

رجالهم مايرتخي فالشدايد

كسب الثنا يمه تدرهم مطاياه

مطارد مطارد وسيع البنايد

مطارد اللي مايوصف بحلياه

الجار لايمكن ينـوشـه نـقـايـد

يقدره ويـقـلـطه فـوق مـركـاه

سوالــفه جزله ومـعـها قصايد

مـفتـوح بابه والمسايير تنصاه

ليته من الادنـيـن ماهوب نايد

كل الخصال الطيبه من سجاياه

حرٍ تسلسل من رفيع السنايد

وكره على رآس الطويله تعلاه

هواجسي جابت بيوتن جدايد

ابيات شعر من الشوايب منقاه

اشهدله ولاهو بحاجه شهايد

حاز المراجل ثم جلبها لمرباه

لديار شمر طيبين العوايد

باطراف حايل شيد البيت مبناه

ماهو عشاش مشيد البني كايد

بيته وسيع ويشرح الصدر سكناه

بـيـتٍ يرودونه جميع البدايد

بـيـت الكرم والواجـبـه ماتـعـداه

عشر سنين وكل عيد نتعايد

مـرت سريع تقول عشر ليالااه

حـنـا وشمر كاسبين الحمايد

جـيـره عزاز نـفـوس ماهي مضاهاه

يـوم بـعـض الجيران فيهم حـقايـد

لااتـفـه سبب يرفع على الجار شكواه

حصل بعضنا من بعضنا مجايد

سـوالفـن تبقا من الرجل لابناه

واليـوم صرنا عن بعضنا بعايد

ان زارنا ولا زياره وصلناه

تـفريـقـه الدنيا بليا وعايد

غـدر الزمن ماتتضحلك خـفـاياه

يـدري بها العـاقل تخـفي لاهايد

واللي كتب للعبد يومن ويرضاه

والصبر مفتاح الفرج للنكايد

عزي لمن مايملك الصبر عــزاه

وصلاه ربي عد رش الرعايد

هطال مزن الوسم يوم انـتـثر ماه

بامر الذي سيدٍ على كل سايد

الواحـد الفـرد الصمد عالي الجـاه


قصيده في ذعار بن مطلق العضياني

لا والله اللي راح كساب الامداح

ذعار ابو سامي وسيع المناحي

نهض بجنحان السعد فوق ما طاح

طبعه وعاداته بعيد المشاحي

نجمن سطع نوره بعرض السما لاح

راح الحصان وكل دربه سماحي

طلع بوجه ابيض على نور مصباح

رجال من رؤس الرجال الصحاحي

يسعد قلوب ويرعب قلوب الاشباح

رجلٍ نظيف وكامل العقل صاحي

في حاله يداوي وفي حال جراح

يسقي خصيمه كاس سم الذحاحي

وله فزعتـن من بعدها الضيق ينزاح

من خاطرٍ طلق وبشوش وسماحي

ياقف معك ياطالب الجاه بنصاح

حتى يوردك الزلال القراحي

قدايمه تبقى على راس ملواح

وفضله على كل الجميع متواحي

بيته تقول انه من قصور الافراح

وفي صدره لربعه سعه وانشراحي




وفي الختام تقبلوا تحياتنا